آرمی چیف جنرل قمر جاویدباجوہ کا کہنا ہے کہ ہم دہشتگردی کے خلاف آپریشن کے بعد استحکام کے فیز کی جانب گامزن ہیں، پاکستان مخالف غیر ملکی ایجنسیوں سمیت دہشتگردی کی جڑ کے خلاف اقدامات جاری رکھنے ہوں گے۔ کچھ عناصر ملک کو عدم استحکام کی جانب دھکیلنا چاہتے ہیں،ریاست کو اس صورتحال میں دھکیلنے نہیں دیں گے۔
آئی ایس پی آر کے مطابق آرمی چیف جنرل قمر جاوید باجوہ نے ملتان گریژن کا دورہ کیا اور آرمز فارمیشن کی تربیتی مشقوں کا جائزہ لیا۔آرمی چیف نے ملتان گریژن کے افسران سے بھی ملاقاتیں کیں اور ملک کی سکیورٹی صورتحال، درپیش چیلنجز اور ان کے تدارک کے حوالے سے اپنے خیالات کا اظہار کیا۔
آرمی چیف نے جوانوں سے خطاب کرتے ہوئے کہا کہ ہم دہشتگردی کے خلاف آپریشن کے بعد استحکام کے فیز کی جانب گامزن ہیں، دہشتگردی اور عسکریت پسندی کے خلاف جنگ تاحال جاری ہے۔پاکستان مخالف غیر ملکی ایجنسیوں سمیت دہشتگردی کی جڑ کے خلاف اقدامات جاری رکھنے ہوں گے۔
آرمی چیف کا کہنا تھا کہ کچھ عناصر ملک کو عدم استحکام کی جانب دھکیلنا چاہتے ہیں، مذہبی، لسانی یا کسی دوسرے بہانے کے نام پر ریاست کو اس صورتحال میں دھکیلنے نہیں دیں گے۔دیرپا قیام امن، سماجی اور معاشی ترقی کے لیے قومی ایکشن پلان کے تحت ریاستی اداروں کے ساتھ مل کر کام کرنا ہوگا۔
