مہنگائی کی وجہ سے عوام جس مشکل میں ہیں اس کا احساس ہے، وزیراعظم پاکستان عمران خان

راولپنڈی: وزیراعظم پاکستان عمران خان نے کہا ہے کہ  مہنگائی کی وجہ سے عوام جس مشکل میں ہیں اس کا مجھے احساس ہے۔ راولپنڈی میں ماں و بچہ اسپتال کی افتتاحی تقریب سے خطاب کرتے ہوئے وزیراعظم نے کہا کہ مہنگائی کی وجہ سے عوام مشکل میں ہے، اس کا مجھے احاس ہے، گیس، بجلی اور مہنگائی بڑھنے کی وجہ اداروں کا مقروض ہونا ہے۔

ان کا کہنا تھا کہ  پچھلا نظام صحیح نہیں تھا جس میں بجلی اور گیس پر قرضے چڑھے ہوئے تھے، گیس سیکٹر پر 150 ارب روپے کا قرضہ چڑھ گیا ان قرضوں کو اتارنے کے لیے تھوڑی دیر قوم کو مشکل سے گزرنا ہوگا،آمدنی کو بڑھائیں گے اور خرچے کم کریں گےمگر آمدنی بڑھنے میں تھوڑا وقت لگتا ہے۔

وزیراعظم پاکستان عمران خان نے کہا کہ عوام کو مشکلات کا سامنا ہے،قوموں کی زندگی میں اچھے برے وقت آتے جاتے رہتے ہیں ، مشکل وقت سے گزر جائیں گے اس لیے  فکر نہ کریں  یہ عظیم ملک بنے گا، جیسے جیسے نظام ٹھیک ہوتا جائے گا  عوام کو اندارہوگا  کہ  اللہ نے اس ملک کو کتنی نعمتوں سے نوازا ہے۔

وزیراعظم نے کہا کہ عام آدمی کی مشکلات کا حل کرنا حکومت کا کام ہے، حکومت نے بے گھر افراد کے لیے پناہ گاہیں بنائیں، ان پناہ گاہوں کی تعداد میں اضافہ کیا جارہا ہے جب کہ بے روزگار نوجوانوں کو کاروبار کے لیے قرضے دیں گے، غریب گھرانوں کو وسائل فراہم کریں گہ تاکہ وہ اپنے پاؤں پر کھڑے ہوسکیں، شہروں میں غریبوں اور تنخواہ دار طبقے کے لیے سستے گھروں کی اسکیم لارہے ہیں  جس سے عام آدمی کو سستا گھر ملے گا۔