لاہور : سول ایوی ایشن اتھارٹی نے لاہور ایئرپورٹ کے رن وے پر کارگو طیارے کے ٹائرپھٹنے کے واقعے اور فضائی آپریشن معطل ہونے کی تحقیقات کا حکم دے دیا۔
تفصیلات کے مطابق سول ایوی ایشن اتھارٹی نے علامہ اقبال انٹر نیشنل ایئرپورٹ پر کارگو طیارے کو حادثہ اور رن وے بند ہونے سے متعلق واقعہ کا نوٹس لے لیا۔
ڈی جی سی اے اے نے لاہور ایئرپورٹ پر فضائی آپریشن معطل ہونے اور غیر ملکی کارگو طیارے کو حادثے پر تحقیقات کا حکم دے دیا، ذرائع کا کہنا ہے کہ نجی کمپنی کے طیارے کے ٹائر برسٹ ہونے کے معاملے کی تحقیقات ہوگی۔
اس حوالے سے سی اے اے کے شعبہ فلائٹ اسٹینڈرڈ کو تحقیقات کا ٹاسک دے دیا گیا ہے، تحقیقاتی ٹیم پتہ لگائے گی کہ طیارے کے ٹیک آف کے دوران رن وے پر چھ ٹائر برسٹ کیوں ہوئے۔
دوسری جانب ایئرکرافٹ ایکسیڈنٹ اینڈ انویسٹیگیشن بورڈ نے لاہور ایئرپورٹ پر ڈی ایچ ایل کارگو حادثے پر تحقیقات شروع کردی گئی ہے، ذرائع کا کہنا ہے کہ ایئر کرافٹ ایکسیڈنٹ انویسٹیگیشن بورڈ الگ سے تحقیقات کرے گا اور اپنی رپورٹ اعلیٰ حکام کو پیش کرے۔
خیال رہے لاہور ایئرپورٹ پر غیرملکی کارگو طیارے کے ٹائرپھٹنے کے بعد رن وے پر آپریشن معطل ہوگیا تھا ، جہازمیں سامان بھرا ہونے کی وجہ سے ٹائر تبدیل نہیں کیے جاسکتے تھے تاہم سامان اتارنے کے بعد جہاز رن وے سے ہٹایا گیا۔
