فون پر دوستی کر کے شہریوں اغواء کرنیوالی خاتون 3 ساتھیوں سمیت گرفتار

کراچی: سی ٹی ڈی نے کراچی میں ایک خاتون سمیت 4 ملزمان کو شہریوں کو اغواء کرنے اور ان سے بھتہ لینے کے الزامات کے تحت گرفتار کیا ہے۔

کاؤنٹر ٹیررازم ڈپارٹمنٹ کے شعبۂ تفتیش کے انچارج چوہدری غلام صفدر کے مطابق گرفتار ملزمان میں سجاد خان، محمد ارباز، سلمان اور ایک خاتون شنو شامل ہیں۔

غلام صفدر کے مطابق گرفتار ملزمہ شنو مختلف لوگوں کو فون کر کے ان سے دوستی کرتی تھی اور پھر منصوبہ بندی کے تحت انہیں ملنے کے لیے مخصوص مقامات پر بلوا لیتی تھی۔

ان مقامات پر اس کے دیگر ساتھی ملزمان سی ٹی ڈی کے اہلکار بن کر چھاپہ مار کارروائی کرتے اور دونوں کو حراست میں لے کر اغواء کر لیتے تھے۔

ملزمان اس دوران دکھاوے کے طور پر لڑکی اور اس کے دوست کو بلیک میل کرتے تھے، اصل مقصد مرد کو بلیک میل کر کے بھاری رقوم اینٹھنا ہوتا تھا۔

غلام صفدر کے مطابق ملزمان نے حال ہی میں شمائل نامی نوجوان کو اغواء کیا اور اسے رہا کرنے کے عوض 2 لاکھ روپے وصول کیے۔

ملزمان اس سے طے شدہ مزید 7 لاکھ روپے وصول کرنے کے لیے الفلاح کے علاقے میں پہنچے تو سی ٹی ڈی کی پولیس پارٹی نے انہیں گرفتار کر لیا۔

واقعے کا مقدمہ الفلاح تھانے میں درج کرایا گیا ہے۔

سی ٹی ڈی حکام نے شہریوں سے اپیل کی ہے کہ وہ اس طرح کی بلیک میلنگ میں نہ آئیں اور فوری طور پر پولیس کو آگاہ کریں۔