لیاری کی یونیورسٹی میں اسٹوڈنٹ فیسٹیول کے دوران  بھارتی فلم دکھائے جانے کا انکشاف

کراچی:  بے نظیر بھٹو شہید یونیورسٹی میں اسٹوڈنٹ فیسٹیول کے دوران  بھارتی فلم دکھائے جانے کا انکشاف ہوا

لیاری میں قائم بے نظیر بھٹو شہید یونیورسٹی میں فیسٹیول کےدوران بھارتی فلم دکھانے پر وزیر جامعات سندھ اسماعیل راہو نے نوٹس لیتے ہوئے 3 رکنی کمیٹی تشکیل دے دی۔

بے نظیر بھٹو شہید یونیورسٹی میں اسٹوڈنٹ فیسٹیول کے دوران طلبہ کو جمعرات کے روز بھارتی فلم دکھائے جانے کا انکشاف ہوا تھا، جس میں نامناسب لباس اور غیر اخلاقی رقص بھی طالب علموں نے دیکھا۔

انتظامیہ کا کہنا تھا کہ یونیورسٹی اس طرح کی بُری مثال کی کسی صورت بھی کیمپس میں اجازت نہیں دے سکتی۔ اس معاملے پر وزیر جامعات اسماعیل راہو نے نوٹس لیتے ہوئے 3 رکنی کمیٹی تشکیل دے دی اور کہا کہ معاملے کی تحقیقات کی جائے گی۔

تحقیقاتی کمیٹی کی سربراہی ایڈیشنل سیکرٹری جامعات و بورڈز عبدالفتاح کریں گے۔ کمیٹی لیاری یونیورسٹی میں فیسٹیول کے دوران بھارتی فلم دکھانےکی تحقیقات کرکے 14 روز میں رپورٹ پیش کرے گی۔

تحقیقات مکمل ہونے کے بعد ذمے داران کے خلاف سخت کارروائی کی جائے گی۔ انہوں نے مزید کہا کہ تمام سرکاری و نجی جامعات طلبہ کو تقریبات میں ایسی غیر اخلاقی چیزیں دکھانے سے منع کریں۔