کراچی سمیت سندھ کے مختلف شہروں میں کل سے آندھی کے ساتھ بارش کی پیش گوئی

 کراچی: محکمۂ موسمیات  نے کراچی سمیت سندھ کے مختلف شہروں میں کل سے آندھی کے ساتھ بارش کی پیش گوئی کی گئی ہے۔

محکمۂ موسمیات کے مطابق مغربی ہواؤں کا سلسلہ ملک کے بالائی علاقوں پر مسلسل اثر انداز ہے، یہ سسٹم آج سے ملک کے جنوبی اور مغربی علاقوں میں داخل ہو جائے گا۔

محکمۂ موسمیات نے بتایا ہے کہ 13 اور 14 اپریل کو کراچی، سکھر، لاڑکانہ سمیت سندھ کے دیگر مقامات پر آندھی اور بارش متوقع ہے۔

سندھ کے مختلف علاقوں میں کہیں معتدل اور کہیں موسلا دھار بارش کا امکان ہے۔

شمال مشرقی بلوچستان میں مغربی موسمی سسٹم اثر انداز ہونا شروع ہو گیا ہے۔

طاقت ور مغربی موسمی لہر بلوچستان کے شمال سے داخل ہونے سے قلعہ عبداللّٰہ، پشین، خانوزئی، مسلم باغ، زیارت اور سنجاوی میں غیر معمولی طوفانی ہوائیں چلنا شروع ہو گئیں، جب کہ چمن، مالاکنڈ، زیارت، کوژک ٹاپ اور شیلا باغ میں تیز بارشیں شروع ہو گئیں۔

تیز آندھی اور طوفانی بارشوں سے کوئٹہ چمن شاہراہ پر ٹریفک کی روانی متاثر ہو رہی ہیں۔

پی ڈی ایم اے نے موسم کی صورتِ حال پر ہائی الرٹ جاری کیا ہے جس کے مطابق 30 سے 40 کلو میٹر فی گھنٹہ کی رفتار کی ہوائیں جنوب سے شمال میں پاک افغان بارڈر سے ٹکرائیں گی۔

پی ڈی ایم اے نے موسلا دھار بارش اور ژالہ باری سے سیلابی صورتِ حال کا امکان ظاہر کرتے ہوئے صوبے بھر میں تمام ضلعی ڈپٹی کمشنرز کو وارننگ جاری کی ہے۔