رینجرز کے علی الصبح چھاپے، ایم کیو ایم زونل کمیٹی کے ممبران گرفتار
رینجرز نے آج صبح حیدر آباد میں کاروائی کرتے ہوئے متحدہ قومی موومنٹ حیدرآباد کی زونل کمیٹی کے تین ممبران اور اے پی ایم ایس او کے سیکٹر آرگنائزر کی غیر موجودگی میں اُن کے والد کو گرفتار کرکے نامعلوم مقام پر منتقل کر دیا۔
تفصیلات کے مطابق رینجرز نے آج صبح سندھ کے دوسرے بڑے شہر حیدرآباد میں چھاپہ مار کاروائی کرتے ہوئے متحدہ قومی موومنٹ کے زونل کمیٹی کے تین اراکین سہیل مشہدی،رفیق اجمیری اور راحیل فہیم کو اُن کے گھروں سے گرفتار کر لیا،رینجرز نے ایم کیو ایم کے طلبا ونگ ’’اے پی ایم ایس او‘‘ کے سیکٹر آرگنائزر علی رضا وکیل کے گھر پر بھی چھاپہ مارا،تاہم اُن کی غیر موجودگی پر علی رضا کے والد محمد وکیل کو حراست میں لے کر نامعلوم مقام پر منتقل کر دیا گیا۔رینجرزنے مذید کاروائی کرتے ہوئے گرونگرکے علاقے میں ’’اے پی ایم ایس او‘‘ کے سابق سیکٹرممبر عامرخانزادہ کے گھرپر بھی چھاپہ مارا،اُن کے نہ ملنے پررینجرز نے ان کے بھائی کے گھرپربھی چھاپہ مارا۔ بعد ازاں رینجرزنے حالی روڈکے علاقے میں ایم کیوایم کے کارکنوں کے نعیم چھیپا اورشبیرگدی کے گھروں پربھی چھاپے مارے۔ذرائع کے مطابق زونل ممبرز سہیل مشہدی کو صدیق پلازہ یونٹ نمبرآٹھ لطیف آباد، رفیق اجمیری کوحیدرآبادکے علاقے ریشم بازار اورراحیل فہیم کولطیف آبادنمبر9میں ان کے گھروں سے گرفتارکیاگیا جب کہ رینجرز نے چیتل چاڑی کے علاقے میں اے پی ایم ایس او کے سیکٹرانچارج علی رضا وکیل کے گھرپر بھی چھاپہ مارا تاہم ان کے نہ ملنے پر ان کے والد محمدوکیل کو حراست میں لے لیا۔
ایم کیوایم کے رہنماؤں کا کہنا ہے کہ چھاپے بغیر کسی وارنٹ مارے گئے،رینجرز کو حیدرآباد میں کاروائی کا کوئی اختیار نہیں۔
یاد رہے دو روز پیشتر ہی متحدہ قومی موومنٹ اور پاک سر زمین پارٹی کے کارکنان کے درمیان تصادم ہوا تھا جس میں ایک خاتون سمیت دس افراد زخمی ہوئے تھے جبکہ ایک جماعت کے یونٹ آفس کو بھی جلا دیا گیا تھا اور کل ہی ڈی رینجرز نے تین سیاسی جماعتوں جماعتوں کے وفد سے بھی ملاقات کی تھی جس میں متحدہ قومی موومنٹ اور پاک سرزمین پارٹی بھی شامل تھی
