کراچی:پاکستان تحریک انصاف (پی ٹی آئی) کے رہنماءعامر لیاقت حسین نے سابق وزیراعظم نواز شریف اور مریم نواز کی وطن واپسی اور گرفتاری پر تبصرہ کرتے ہوئے اب تک کی سب سے شرمناک ترین بات کہہ دی ہے جس پر پاکستانیوں کیلئے غصہ برداشت کرنا مشکل ہو گیا ہے۔
ڈاکٹر عامر لیاقت حسین نے نجی ٹی وی اے آر وائی نیوز کی خصوصی نشریات کے دوران میزبان وسیم بادامی سے گفتگو کرتے ہوئے کہا کہ چور سہولت کار کے ساتھ آرہا ہے، نواز شریف ابلیس کی نشانی ہے، چوروں کا استقبال نہیں ہوتا، ان چوروں کو گرفتار کرکے جیل منتقل کیا جائے ۔
عامر لیاقت نے رانا ثناءاللہ کے بیان پر تبصرہ کرتے ہوئے کہا کہ انہوں نے تمام حدیں پار کر دی ہیں اور انہوں نے شعائر اسلام کی توہین کی ہے کیونکہ حج اللہ کے شعائر میں سے ایک ہے۔ حج جیسے مقدس فریضے کو نواز شریف کے استقبال کے ساتھ منسلک کرکے اسلام کی توہین کی گئی ہے، نواز شریف شعائر ابلیس ہے یعنی وہ ابلیس کی نشانی ہے۔
واضح رہے کہ ایون فیلڈ ریفرنس میں سزا یافتہ سابق وزیراعظم نوازشریف اور ان کی صاحبزادی مریم نواز کو نیب اور ایف آئی اے کی ٹیم نے لاہور ایئرپورٹ پر طیارے میں ہی حراست میں لیا تھا، دونوں مجرموں کو خصوصی طیارے کے ذریعے اسلام آباد روانہ کیا گیا اور پھر اڈیالہ جیل منتقل کیا گیا۔
