کراچی میں خاتون اینکر کو تھپڑ مارنے والے ایف سی اہلکار کیخلاف مقدمہ درج
کراچی: نادرا کے دفتر کے باہر نجی ٹی وی کی خاتون اینکر کو تھپڑ مارنے والے ایف سی اہلکار کے خلاف مقدمہ درج کرلیا گیا۔
یہ واقعہ کراچی کے علاقے لیاقت آباد میں پیش آیا جہاں نادرا آفس کے باہرنجی ٹی وی کی خاتون میزبان عوام کی مشکلات کے حوالے سے پروگرام کررہی تھیں کہ اس دوران وہاں سیکیورٹی پر مامور ایف سی اہلکار نے کمیرہ مین کو ریکارڈنگ سے روکنے کی کوشش کی جس پر خاتون اینکر نے ایف سی اہکار کو ایسا کرنے سے منع کیا اور کچھ سخت جملے بھی کہے جب کہ اس دوران خاتون نے اہلکار کی وردی پر بھی ہاتھ ڈالا اور کھیچا تانی کی جس پر اہلکار نے مشتعل ہو کر خاتون اینکر کو تھپڑ دے مارا۔ واقعے کے بعد صحافی برادری کی جانب سے شدید احتجاج کیا گیا ہے جب کہ بعض حلقوں کی جانب سے خاتون اینکر کے رویے پر بھی تنقید کی جارہی ہے۔
واقعے کی ویڈیو سوشل میڈیا پر وائرل ہونے کے بعد مذکورہ ایف سی اہلکار کے خلاف مقدمہ درج کرلیا گیا ہے جس میں ہوائی فائرنگ اور خاتون پر تشدد کرنے کی دفعات شامل ہیں۔ خاتون کو تھپڑ مارنے کے بعد وہاں موجود افراد شدید مشتعل ہوگئے تھے جن کے غصے اور مارپیٹ سے بچنے کے لیے ایف سی اہلکار نے 18 بلیٹ ہوائی فائر بھی کیے۔
