بلاول بھٹو زرداری کا جمعرات کو سکھر میں مہنگائی کے خلاف دھرنے کا اعلان

سکھر: پاکستان پیپلز پارٹی کے چیئرمین بلاول بھٹو زرداری نے جمعرات کو مہنگائی کے خلاف دھرنے کا اعلان کیا ہے۔ سکھر میں خطاب کے دوران بلاول بھٹو زرداری نے کہا کہ عمران خان کا ہر وعدہ اور ہر دعوی جھوٹا نکلا، ایک کروڑ نوکریوں کا وعدہ جھوٹ نکلا۔

پچاس لاکھ گھر دینے کا وعدہ بھی جھوٹا نکلا

ان کا کہنا تھا کہ عوام دشمن بجٹ میں ایک نوکری بھی نہیں، عوام دشمن بجٹ میں ایک گھر بھی نہیں، پچاس لاکھ گھر دینے کا وعدہ بھی جھوٹا نکلا۔ بجٹ میں کرپٹ کو کھلی چھوٹ دینا اور قربانی کے جانور تک کا منی ٹریل مانگنا کون سا نظام ہے؟۔

بلاول بھٹو زرداری نے کہا کہ جب تک ہمارے جمہوری وآئینی حقوق محفوظ نہیں ہوں گے، معاشی حقوق بھی محفوظ نہیں ہوسکتے، آصف زرداری نے عالمی معاشی بحران کے باوجود پینشن اور تنخواہوں میں اضافہ کیا۔

یہ بھی پڑھیں: آج انتقام کی سیاست ہے، ہمارا مقابلہ سلیکٹڈ وزیراعظم سے ہے، چیئرمین پیپلز پارٹی بلاول

انہوں نے کہا کہ اگر پاکستان پیپلز پارٹی سے سیاسی لڑائی ہے تو اس کا مطلب یہ نہیں کہ پورے صوبے کو ٹارگٹ کیا جائے، پنجاب، بلوچستان، خیبرپختونخوا اور سندھ کا معاشی قتل کیا جارہا ہے، جمعرات کو سکھر میں مہنگائی کے خلاف دھرنا دیا جائے گا اور سکھر سے پنجاب بارڈر تک ریلی نکالی جائے گی۔

فوج کو پولنگ اسٹیشن میں کھڑا کرکے ادارے کو متنازع کیا جارہا ہے

چیئرمین پیپلز پارٹی کا کہنا تھا کہ فوج کو پولنگ اسٹیشن میں کھڑا کرکے ادارے کو متنازع کیا جارہا ہے، ایک عمران خان کے لئے فوج کو متنازع کیوں کیا جارہا ہے؟ فاٹا کے لئے فوج کو پولنگ اسٹیشن سے ہٹانے کا فیصلہ خوش آئند ہے، امید کرتا ہوں کہ گھوٹکی کے پولنگ اسٹیشنز سے بھی فوج کو پولنگ اسٹیشنوں سے باہر رکھنے کا فیصلہ کیا جائے گا۔