ذوالفقارعلی بھٹو کا 89 واں یوم پیدائش آج منایا جارہا ہے
کراچی / لاہور: پیپلز پارٹی کے بانی اور سابق وزیراعظم ذوالفقار علی بھٹو کا 89 واں یوم پیدائش ملک بھر میں منایا جارہا ہے۔
پیپلزپارٹی کے بانی اور سابق وزیراعظم ذوالفقار علی بھٹو کا 89 واں یوم پیدائش ملک بھر میں منایا جارہا ہے، اس سلسلے میں پیپلز پارٹی کی جانب سے ملک بھر کے تمام اضلاع میں یوم پیدائش کی تقریبات منعقد کی جائیں گی اور کیک کاٹے جائیں گے۔ نوڈیرو ہاؤس لاڑکانہ میں منعقدہ تقریب میں آصف علی زرداری ،بلاول بھٹو زرداری اور بختاور بھٹو زرداری بھی شرکت کریں گی۔ ذرائع کے مطابق پارٹی قیادت نے ارکان پارلیمنٹ کو نوڈیرو پہنچنے کی ہدایت کردی ہے۔
دریں اثنا ذوالفقارعلی بھٹوکے 89 یوم پیدائش کے موقع پر پیغام میں سابق صدرمملکت اور پیپلز پارٹی پارلیمنٹیرینز کے صدر آصف علی زرداری نے کہا ہے کہ یہ شہید ذوالفقار علی بھٹو ہی تھے جنھوں نے اپنی جان ملک اور جمہوریت کے لیے قربان کر دی، بھٹوعوام کی طاقت کی علامت تھے۔ اس سال شہید ذوالفقار علی بھٹو کے یوم پیدائش پر عوام کا اتحاد ہی انھیں خراج عقیدت پیش کرنے کا بہترین طریقہ ہے۔
پیپلزپارٹی کے چیئرمین بلاول بھٹو زرداری نے کہاہے کہ شہید ذوالفقار علی بھٹو تاریخ میں ہمیشہ زندہ رہنے کیلیے پیدا ہوئے تھے اور جو لوگ ان کو ختم کرنا چاہتے تھے وہ خود مٹ گئے اور بھٹو آج بھی پاکستان کے عوام کے ذہنوں اور دلوں میں زندہ ہیں، پیپلز پارٹی اور اس کے کارکنان شہید ذوالفقار علی بھٹو کے مشن اور ویژن کی پیروی کرتے رہیں گے اور ان کے خوابوں کی تکمیل تک آرام سے نہیں بیٹھیں گے۔
پیپلزپارٹی سندھ کے جاری اعلامیے کے مطابق پیپلزپارٹی کے بانی شہید ذوالفقار علی بھٹو کے یوم پیدائش پر پیپلز سیکریٹریٹ مزار قائد کراچی میں تقریب منعقد کی جائے گی۔ اس تقریب میں سالگرہ کا کیک کاٹنے کے بعد پی پی پی سندھ کے صدر نثار احمد کھوڑو، صوبائی وزرا، ڈویژنل و صوبائی رہنما اور عہدیداران ،منتخب اراکین اسمبلی قائد عوام شہید ذوالفقار علی بھٹو کی شخصیت اور ان کے سیاسی کردار پر روشنی ڈالیں گے جبکہ شہر کے مختلف مقامات اور پارٹی دفاتر میں یوم پیدائش کے حوالے سے تقاریب منعقد کی جائیں گی، لاہور میں کیک کاٹنے کی تقریب پیپلزپارٹی وسطی پنجاب کے دفتر واقع ماڈل ٹاؤن میں منعقد ہوگی جہاں پیپلزپارٹی وسطی پنجاب کے صد رقمر الزمان کائرہ ذوالفقار علی بھٹو کے یوم پیدائش پر کیک کاٹیں گے جبکہ تقریب میں پی پی پی سینٹرل پنجاب کے رہنما اور کارکنوں کی کثیر تعداد میں شرکت متوقع ہے۔
