محمد زبیر سے نیپال کی سفیر نے گورنر ہاؤس میں ملاقات
اس موقع پر گورنر سندھ نے کہا کہ پاکستان کا سب سے بڑا مسئلہ توانائی کا ہے، اس ضمن میں وفاقی حکومت نے توانائی کے حصول کے لئے میگا پروجیکٹس تشکیل دیئے ہیں جبکہ پاک چین اقتصادی راہداری منصوبہ میں بھی توانائی کے منصوبوں کو اہمیت دی جارہی ہے ۔
انہوں نے کہا کہ صوبہ میں قیام امن کے بعد سرمایہ کاری کا ماحول ساز بن چکا ہے، صوبائی حکومت بھی سرمایہ کاروں کو ہر ممکن تعاون فراہم کررہی ہے ۔
نیپال کی سفیر نے گورنر سندھ کو بتایا کہ دنیا کی طرح نیپال بھی اس بات کو تسلیم کرتا ہے کہ پاکستان بالخصوص صوبہ سندھ میں امن وامان قائم ہو گیا ہے، نیپال کے سرمایہ کار بھی پاکستان بالخصوص صوبہ سندھ میں سر مایہ کاری کے خواہاں ہیں۔
دریں اثنا ء گورنر سندھ محمد زبیر سے گورنر ہاؤس میں انڈونیشیا کے نئے تعینات ہونے والے قونصل جنرل نے ملاقات کی، ملاقات میں دوطرفہ تعلقات و سرمایہ کاری ، خطہ کی مجموعی صورتحال اور دلچسپی کے دیگر امور پر تفصیلی تبادلہ خیال کیا گیا ۔
اس موقع پر گورنر سندھ نے کہا کہ صوبہ سندھ بالخصوص کراچی میں امن و امان کی صورتحال سرمایہ کاری کے لئے انتہائی مفید و موافق ہوچکی ہے، ضرورت اس امر کی ہے کہ زیادہ سے زیادہ سے سرمایہ کاری کرکے پرکشش مواقعوں سے بھرپور فائدہ اٹھایا جائے ۔
انہوں نے کہا کہ سندھ قدرتی وسائل سے مالا مال صوبہ ہے جہاں انتہائی تربیت و تعلیم یافتہ ہیومن ریسورس بھی دستیاب ہے جبکہ خطہ میں منفرد اہمیت رکھنے والا کراچی شہر سرمایہ کاری کے لئے پر کشش حیثیت رکھتا ہے ۔
انہوں نے کہا کہ صوبہ میں غیر ملکی سرمایہ کاری میں حصہ لینے والے سرمایہ کار بھرپور فائدہ اٹھا رہے ہیں اس ضمن میں انڈونیشیا کے سرمایہ کار بھی صوبہ میں سرمایہ کاری کرکے مواقعوں سے فائدہ اٹھائیں۔
