عدالت نے اہم سیاسی رہنما کو بیرون ملک جانے کی اجازت دے دی

سندھ ہائی کورٹ نے پیپلز پارٹی کے رہنما نثار کھوڑو کا نام ایگزٹ کنرول لسٹ(ای سی ایل) سے نکالنے کا حکم دیدیا ہے۔

تفصیلات کے مطابق سندھ ہائی کورٹ کراچی میں نثار کھوڑو کی بیرونِ ملک جانے کی درخواست پر سماعت ہوئی۔عدالتِ عالیہ نے اپنے حکم میں کہا کہ نثار کھوڑو 9 اپریل سے 19 مئی 2021ء تک ملک سے باہر جا سکتے ہیں۔دورانِ سماعت نیب پراسیکیوٹر نے دلائل دیتے ہوئے کہا کہ نثار کھوڑو کے خلاف نیب تین انکوائریاں کر رہا ہے، خدشہ ہے کہ ملزم ملک سے باہر جانے کے بعد وطن واپس نہیں آئیں گے۔نیب پراسیکیوٹر نے عدالت سے استدعا کی کہ نثار کھوڑو کو باہر جانے کی اجازت نہ دی جائے۔نثار کھوڑو کے وکیل نے دلائل دیتے ہوئے کہا کہ نثار کھوڑو کی فیملی ملک سے باہر مقیم ہے، کورونا وائرس اور لاک ڈاؤن کے باعث نثار کھوڑو فیملی سے نہیں ملے۔

دونوں جانب سے دلائل سننے کے بعد عدالتِ نے نثار کھوڑو کی بیرونِ ملک جانے کی درخواست منظور کرتے ہوئے ان کانام ای سی ایل سے نکالنے اور انہیں بیرونِ ملک جانے کی اجازت دے دی۔