جناح انٹرنیشنل ایئرپورٹ پر کرونا وائرس سے متاثر مسافروں کی تعداد میں اضافہ

کراچی: صوبہ سندھ کے دارالحکومت کراچی میں جناح انٹرنیشنل ایئرپورٹ پر مزید 5 مسافروں میں کرونا وائرس کی تشخیص ہوگئی، ایئرپورٹ پر بیرون ملک سے آنے والے کرونا مریضوں کی تعداد 30 ہوچکی ہے۔

تفصیلات کے مطابق کراچی کے جناح انٹرنیشنل ایئرپورٹ پر مسافروں میں کرونا وائرس کے کیسز کی تعداد میں اضافہ دیکھا جارہا ہے۔

غیر ملکی ایئر لائن کے ذریعے دبئی سے کراچی پہنچنے والے 5 مسافروں کے کرونا ٹیسٹ مثبت نکلے، 100 سے زائد مسافروں کے ریپڈ ٹیسٹ کیے گئے تھے جن میں سے 5 مسافر کرونا وائرس سے متاثر نکلے۔

ایئرپورٹ ذرائع کا کہنا ہے کہ مذکورہ مسافروں کو قرنطینہ میں منتقل کیا جائے گا۔

ذرائع نے مزید بتایا کہ جناح انٹرنیشنل ایئرپورٹ پر مجموعی طور پر 30 مسافروں کے کووڈ 19 ٹیسٹ مثبت آئے ہیں۔

دوسری جانب ملک بھر میں کرونا کیسز اور اموات میں اضافہ جاری ہے، گزشتہ 24 گھنٹوں میں مزید 104 اموات ریکارڈ کی گئیں جبکہ 3 ہزار 200 سے زائد کیسز سامنے آئے۔

این سی او سی کے مطابق کرونا وائرس سے اموات کی مجموعی تعداد 19 ہزار 856 تک پہنچ گئی ہے جبکہ مجموعی مریضوں کی تعداد 8 لاکھ 80 ہزار 362 ہوچکی ہے۔

ملک بھر میں کرونا وائرس کے فعال کیسز کی تعداد 66 ہزار 377 ہے جبکہ اب تک 7 لاکھ 99 ہزار 951 افراد کرونا وائرس سے صحت یاب ہوچکے ہیں۔