کاؤنٹرٹیرازم ڈیپارٹمنٹ نےریڈ بک کا نیا ایڈیشن جاری کردیا

کراچی : کاؤنٹرٹیرازم ڈیپارٹمنٹ نے 4 سال بعد ریڈ بک کا نیا ایڈیشن جاری کردیا، نئےایڈیشن میں93نئےانتہائی مطلوب دہشت گردوں کےنام شامل کئے گئے ہیں۔

تفصیلات کے مطابق کاؤنٹرٹیرازم ڈیپارٹمنٹ نے ریڈ بک کانواں ایڈیشن جاری کردیا، ترجمان سی ٹی ڈی کا کہنا ہے کہ 4 سال بعدریڈ بک کانیا ایڈیشن جاری کیا گیا ہے، نئےایڈیشن میں93 نئے انتہائی مطلوب اور خطرناک دہشت گردوں کے نام شامل ہیں۔

ترجمان نے بتایا کہ ریڈبک کے نئے ایڈیشن میں مذکورہ تنظیموں کے دہشت گردوں کے نام شامل ہیں ، تنظیموں میں کالعدم داعش، القاعدہ اورتحریک طالبان پاکستان ، انصار الشریعہ،لشکر جھنگوی،جند اللہ پاکستان،سپاہ محمد پاکستان ، سندھ ریولوشنری آرمی اور بلوچ لبریشن آرمی شامل ہیں۔

سی ٹی ڈی نے کہا ہے کہ ریڈ بک میں امن کمیٹی اور لیاری گینگ وار کے دہشتگردوں کے نام بھی شامل ہیں، داعش کے 12، القاعدہ کے18دہشت گردوں، کالعدم تحریک طالبان پاکستان کے23،انصار الشریعہ کے4 ، لشکرجھنگوی کے13اور جند اللہ پاکستان کے 2نام شا مل ہیں۔

ترجمان کے مطابق نئے ایڈیشن میں سپاہ محمد کے24انتہائی مطلوب دہشت گردوں ، سندھ ریولوشنری آرمی کے4،بلوچ لبریشن آرمی کے5 اور لیاری گینگ وار کے35مطلوب دہشت گردوں کے نام بھی شامل ہیں۔

سی ٹی ڈی نے بتایا ہے کہ سابقہ ریڈ بک کے آٹھویں ایڈیشن میں شامل کئی دہشت گردوں کو گرفتارکیا گیا، آٹھویں ریڈ بک سے 10 دہشت گرد گرفتار اور 7دہشت گرد مارے گئے۔

ترجمان سی ٹی ڈی کے مطابق 5دہشت گردقانون نافذ کرنےوالےاداروں سےمقابلےمیں مارےگئے جبکہ 2دہشت گردافغانستان اور شام میں ہلاک ہوئے۔