فاسٹ بولر بریٹ لی کی پہلی فلم کی تشہیری مہم

دبئی: سابق آسٹریلین فاسٹ بولر بریٹ لی اپنی فلم کی تشہیر کے لیے دبئی پہنچ گئے۔

کرکٹ کے میدانوں میں اپنی دھاک بٹھانے والے بریٹ لی نے دیگر شعبہ فنون میں بھی اپنی قسمت آزمائی۔ پہلے وہ موسیقار بنے اور آشا بھوسلے کے ساتھ ایک گانا گایا۔ اب ان کی بالی ووڈ ڈیبیو فلم بھی ریلیز ہونے جارہی ہے۔

بریٹ لی فلم کی تشہیر کے لیے آج کل دبئی میں ہیں جہاں گرینڈ شیرٹن ہوٹل میں ایک تقریب منعقد کی گئی۔

اے آر وائی نیوز سے خصوصی گفتگو کرتے ہوئے بریٹ لی نے کہا کہ فلموں اور کرکٹ کی منظم دنیا میں بہت فرق ہے۔

ان کی فلم ’ان انڈین‘ میں ان کا کردار ایک غیر ملکی استاد کا ہے جو ایک بھارتی لڑکی سے دوستی کرتا ہے۔ مگر اس لڑکی کے والدین اس دوستی کے خلاف ہوتے ہیں۔

فلم کے ہدایتکار انوپم شرما ہیں جبکہ بریٹ لی کے مدمقابل تنیشتا چٹرجی مرکزی کردار ادا کر رہی ہیں۔ فلم میں ’رام لیلا‘ میں ’دھنکور ‘ کا کردار ادا کرنے والی سپریا پھاٹک بھی شامل ہیں۔

فلم کی شوٹنگ آسٹریلیا میں کی گئی ہے اور یہ 4 اگست کو متحدہ عرب امارات میں ریلیز کی جائے گی