بھارت کیخلاف میچ، پاکستان کا عماد وسیم اور شاداب خان کو کھلانے پر غور

مانچسٹر: پاکستان کی کرکٹ ٹیم انتظامیہ بھارت کیخلاف میچ میں دو اسپنرز عماد وسیم اور شاداب خان کو کھلانے پر غور کررہی ہے تاکہ پانچ ریگولرز بولروں کے ساتھ میچ  میں کھیلا جائے۔

 ذرائع کا کہنا ہے کہ بھارت کے خلاف میچ میں محمد عامر، حسن علی اور وہاب ریاض کے ساتھ دو اسپنرز کھیلیں گے۔ شاداب خان، شاہین شاہ آفریدی جب کہ عماد وسیم، آصف علی کی جگہ میچ کھیلیں گے۔

شعیب ملک کی خراب فارم پر سب کو تشویش لاحق ہے لیکن انہیں ایک اور لائف لائن دی جاسکتی ہے، ایسے وقت میں جب کہ آسٹریلیا کے خلاف سنچری بنانے والے حارث سہیل باہر بیٹھے ہیں، شعیب ملک کو ایک اور موقع دینے کا فیصلہ کیا گیا ہے۔

یہ بھی پڑھیں: سرفراز احمد بھارت کیخلاف شیروں کی طرح ٹیم کی قیادت کرے، وسیم اکرم کا مشورہ

سابق کپتان شعیب ملک کو انگلینڈ میں خراب ریکارڈ کے باوجود ورلڈکپ کے لئے پاکستان ٹیم میں شامل کیا گیا، شعیب ملک ابھی تک ٹورنامنٹ میں اپنی کارکردگی سے انصاف نہیں کر سکے ہیں۔

آسٹریلیا کے خلاف میچ میں شعیب ملک نے کئی بار مس فیلڈنگ بھی کی لیکن بیٹنگ میں صفر پر آؤٹ ہونے سے ان کی فارم پر پھر سوال اٹھائے جا رہے ہیں۔

سابق کپتان وسیم اکرم  کا کہنا تھا کہ شعیب ملک آسٹریلیا کے خلاف میچ میں تھکاوٹ کا شکار نظر آرہے تھے۔

ٹاؤنٹن میں جب شعیب ملک صفر پر آوٹ ہوئے تو 37 سالہ شعیب ملک کے ون ڈے کیرئیر میں یہ 14واں موقع تھا جب وہ کوئی رن بنائے بغیر آوٹ ہوئے۔

ورلڈ کپ اسکواڈ میں شامل شعیب ملک پہلے ہی ون ڈے کرکٹ سے ریٹائرمنٹ کا اعلان کرچکے ہیں کہ حالیہ ورلڈ کپ  کے بعد وہ ون ڈے کرکٹ کو خیرباد کہہ دیں گے۔

اس سے قبل وہ ٹیسٹ کرکٹ سے ریٹائر ہوچکے ہیں البتہ ٹی ٹوئنٹی ورلڈ کپ تک پاکستان کے لئے کھیلنے کی خواہش رکھتے ہیں۔

سابق کپتان شعیب ملک نے 286 ون ڈے کی 257 اننگز میں 9 سنچریوں اور 44 نصف سنچریوں کی مدد سے 34.71 کی اوسط سے 7534 رنز بنا رکھے ہیں۔