اسرائیل نے ایران کی 2 بڑی گیس کی لائنوں کو نشانہ بنایا

ایران کی 2 اہم گیس پائپ لائنوں پر اسرائیل کی جانب سے حملے کرنے کا انکشاف ہوا ہے۔

غیرملکی میڈیا رپورٹس کے مطابق اسرائیل نے رواں ہفتے ایران کی 2 بڑی گیس کی لائنوں کو نشانہ بنایا جس کے نتیجے میں لاکھوں ایرانی صارفین کو گیس کی فراہمی معطل ہوگئی۔

مغربی اور ایرانی حکام کا کہنا ہے کہ اسرائیل نے جس طرح گیس کی پائپ لائنوں پر حملے کیے اس کے لیے ایران کے انفرا اسٹرکچر کے بارے میں مکمل معلومات اور غیرمعمولی مہارت درکار تھی۔ اسرائیل نے جامع معلومات اکٹھی کرنے کے بعد 2 ایرانی گیس لائنوں کو ایک ہی وقت میں متعدد حملوں کا نشانہ بنایا۔
ماہرین کے مطابق جن پائپ لائنوں پر حملے ہوئے ان میں سے ہرایک 1,200 کلومیٹر یا 800 میل تک پھیلی ہوئی ہے جس سے روزانہ 2 بلین مکعب فٹ قدرتی گیس منتقل کی جاتی ہے۔ حملوں سے ایران کی یومیہ قدرتی گیس کی پیداوار کا تقریباً 15 فیصد متاثر ہوا۔