بھارتی خاتون نے انڈیگو فلائٹ میں بوائے فرینڈ کو سرپرائز کر دیا

بھارتی خاتون کا فضا میں جیون ساتھی چننے کا دلفریب انداز

بھارت کی پرواز انڈیگو میں ایک خاتون نے اپنے محبوب کو دوران پرواز جب جہاز فضا میں اپنی منزل کی جانب رواں دواں تھا تو پروپوز کر کے حیرت میں ڈال دیا، جس سے سوشل میڈیا صارفین بھی ان کی تعریف کرنے لگے اور اس کو دلفریب قرار دیا۔

این ڈی ٹی وی کی رپورٹ کے مطابق سوشل میڈیا صارف ایشوریا بنسال نے انسٹاگرام پر پورے واقعے کی ایک ویڈیو جاری کی اور لکھا کہ ‘میں نے فضا میں پرپوز کیا’۔

ایشوریا بنسال اور ان کے بوائے فرینڈ امولیا گویال جہاز پر سوار ہو رہے ہیں، دوسرے منظر میں ایشوریہ جہاز کے اندر اپنے دوست کی طرف بڑھ رہی ہیں اور اسی دوران پرواز کی انتظامیہ اس جوڑے کے لیے اعلان کرتی ہے۔

ایشوریہ پھر روایتی انداز میں گھٹنوں کے بل بیٹھ کر اپنے بوائے فرینڈ کو پروپوز کرتی ہیں اور اپنے پیار کا اظہار کرتے ہوئے انگوٹھی ان کی انگلی میں پہنا دیتی ہیں۔

خاتون نے انسٹاگرام پوسٹ میں لکھا کہ جس طرح میں نے سوچا تھا یہ اس سے بہتر تھا، میں انہیں کچھ منفرد اور عام انداز میں حیران کرنا چاہتی تھی اور میرے میرے ذہن میں یہی خیال آیا، حالانکہ مجھے یقین نہیں تھا کہ پرواز کا عملہ اس کی اجازت دے گا یا نہیں لیکن اب جو ہوا آپ سب جانتے ہیں۔

انسٹاگرام میں صارفین کی بڑی تعداد نے اس ویڈیو کو دیکھا اور تقریباً 50 لاکھ مرتبہ دیکھا گیا جبکہ 4 لاکھ 20 ہزار سے زائد افراد نے پسندیدگی کا اظہار کیا۔

سوشل میڈیا میں ویڈیو پر صارفین کے ساتھ ساتھ جہاز کی کمپنی نے بھی جوڑے کو مبارک باد اور دونوں کے لیے نیک خواہشات کا اظہار کیا۔

ایشویہ بانسال کے منفرد انداز کو لوگوں نے مختلف طریقوں سے سراہا یہاں تک کہ چند افراد نے ان سے سوالات بھی کیے اور انڈیگو سے اجازت لینے کے لیے ان کی مدد بھی طلب کی۔

ایک صارف نے لکھا کہ ایسے پروپوزل کا میں بھی مستحق ہوں۔