غزہ جنگ میں حماس کے ساتھ دوبدو جھڑپ میں 778 اسرائیلی فوجی مارے گئے

 غزہ میں حماس کے ساتھ جنگ میں 778  فوجی مارے گئے جن میں 6 کرنل بھی شامل ہیں۔

غزہ میں شہید ہونے والے فلسطینیوں کی تعداد 43 ہزار 314 ہوگئی جب کہ زخمیوں کی تعداد ایک لاکھ سے تجاوز کرگئی۔

غزہ میں حماس کے ساتھ دوبدو جھڑپ میں اسرائیلی فوج کے 2 اہلکار موقع پر ہی ہلاک اور تیسرا شدید زخمی ہوگیا تھا جس نے آج دوران علاج دم توڑ دیا۔

ٹائمز آف اسرائیل کے مطابق فوجی ترجمان کے بیان میں کہا گیا ہے کہ ملٹری اسپتال میں زخموں کی تاب نہ لاتے ہوئے دم توڑنے والا اہلکار 20 سالہ شہنیئور زلمان تھا۔

بیان میں کہا گیا ہے کہ ہلاک ہونے والا اہلکار مغربی کنارے میں یہودی آبادکار کے طور پر رہائش پذیر تھا اور لازمی فوجی تربیت کے پروگرام کے تحت بھرتی کیا گیا تھا۔

اسرائیلی فوج نے دعویٰ کیا ہے کہ مذکورہ اہلکار حماس کے ساتھ جھڑپ میں نہیں بلکہ حادثاتی طور پر ایک ہینڈ گرنیڈ کے پھٹنے سے زخمی ہوا تھا۔ واقعے کی تحقیقات کی جا رہی ہیں۔

اسرائیلی میڈیا کا کہنا ہے کہ ان تینوں ہلاکتوں کے بعد غزہ میں حماس کے ساتھ دوبدو جنگ میں مارے گئے فوجیوں کی تعداد 778 ہے جن میں 6 کرنل بھی شامل ہیں۔

واضح رہے کہ 7 اکتوبر 2023 سے جاری اسرائیلی فوج کی بمباری میں شہید ہونے والے فلسطینیوں کی تعداد 43 ہزار 314 ہوگئی جب کہ زخمیوں کی تعداد ایک لاکھ سے تجاوز کرگئی۔