سعودی عرب خطےمیں کشیدگی پیدا کررہا ہے، ایرانی دفترخارجہ
تہران : ایران نے کہا ہے کہ سعودی عرب خطےمیں کشیدگی پیدا کررہا ہے۔ سفارت خانےجیسا واقعہ دنیامیں پہلی بار نہیں ہوا.
تفصیلات کے مطابق ایرانی دفتر خارجہ کے ترجمان حسین جبیری انصاری نےکہا کہ ایران بین الاقوامی کنونشنز کے تحت سفارتی سکیورٹی فراہم کرنے میں پرعزم ہے۔ لیکن سعودی عرب تہران میں سفارت خانے میں آتشزدگی کے واقعے کو جواز بنا کر کشیدگی میں اضافہ کر رہا ہے.
ترجمان کا کہنا ہے کہ ایران دیگر ممالک سے اپنے بہتر تعلقات کا خواہشمند ہے اور اس سلسلے میں اقدامات کر ر ہا ہے تاہم سعودی عرب ایمبیسی پر حملے کے واقعے سے اپنے وسیع مفاد اور خطے میں کشیدگی کو ہوا دے رہاہے۔
ترجمان کا کہنا تھا کہ سفارت خانے کے حوالے سے جو کچھ بھی ہوا ہے وہ دنیا میں پہلی بار نہیں ہوا۔ لیکن سفارتی تعلقات ختم کرکے سعودی عرب نے خطے میں کشیدگی اور تصادم کی پالیسی جاری رکھے ہوئی ہے۔
واضح رہے کہ سعودی عرب میں شیعہ عالم دین نمر النعمرکو سزائے موت کے بعد ایران اور سعودی عرب کے درمیان تعلقات کشیدہ ہوگئے ہیں.
