بھارت: اترپردیش میں خوفناک ٹرین حادثہ، 17 افراد ہلاک

نئی دہلی : بھارتی ریاست اتر پردیش سے نئی دہلی جانے والی فراکا ایکسپریس کا انجن 9 بوگیوں سمیت پٹری سے اتر گئی تھی جس کے باعث 17 افراد ہلاک، 30 سے زائد افراد زخمی ہوگئے۔

تفصیلات کے مطابق بھارتی ریاست اتر پردیش سے نئی دہلی آنے والی مسافر بردار ٹرین ہرچندپور ریلوے اسٹیشن کے قریب صبح 6 بجے خوفناک حادثے کا شکار ہوگئی جس کے نتیجے میں 7 افراد ہلاک جبکہ 30 سے زائد مسافر زخمی ہوگئے۔

غیر ملکی خبر رساں ادارے کا کہنا تھا کہ فراکا ٹرین مغربی بنگال کے علاقے ملڈا ٹاؤن سے سینکڑوں مسافروں کو لے کر نئی دہلی جارہی تھی لیکن ہرچندپور ریلوے اسٹیشن کے قریب صبح انجن سمیت 9 بوگیاں پٹری سے اتر گئی تھیں۔

بھارتی خبر رساں اداروں کا کہنا ہے کہ ٹرین حادثے میں زخمی ہونے والے مسافروں میں 10 خواتین بھی شامل ہیں۔

مقامی میڈیا کا کہنا ہے ٹرین حادثے میں زخمی ہونے والے افراد میں سے 9 مسافروں کی حالت تشویش ناک بتائی جارہی ہے جس کے باعث ڈاکٹروں نے ہلاکتوں میں اضافے کا خدشہ ظاہر کیا ہے جبکہ پٹری سے اترنے والی بوگیوں کو کاٹ کر کئی مسافروں کو زندہ نکال لیا گیا ہے۔

بھارتی میڈیا کا کہنا ہے کہ حکام نے ہولناک حادثے میں متاثر ہونے والے مسافروں کو ریسکیو کرنے لیے فوج کو بھی طلب کرلیا گیا ہے۔

غیر ملکی خبر رساں ادارے کا کہنا تھا جو بوگیاں ٹرین حادثے میں پٹری سے نہیں اتری تھیں ان بوگیوں کے مسافروں کو بھارتی شہر لکنھو پہنچا دیا گیا ہے، جنہیں خصوصی ٹرین کے ذریعے دہلی روانہ کیا جائے گا۔

مقامی میڈیا کا کہنا ہے کہ ریاست کے وزیر اعلیٰ اور بھارت کے وزیر ریلوے نے حادثے میں ہلاک اور زخمی ہونے والے مسافروں کے لیے امدادی رقوم کا بھی اعلان کیا گیا ہے۔

بھارتی میڈیا کا کہنا ہے کہ سنہ 2016 میں ریاست اتر پردیش میں ایک اور ٹرین کے پٹری سے اترنے کے باعث 150 افراد لقمہ اجل بنے تھے۔