مقبوضہ بیت المقدس: فلسطین میں صہیونی فورسز کی جارحیت جاری ہے، غزہ میں سرحد کے قریب صہیونی فورسز نے فائرنگ کر کے 5 فلسطینی شہید کر دیے۔

تفصیلات کے مطابق صہیونی فورسز کی فائرنگ سے غزہ میں پانچ فلسطینیوں نے جام شہادت نوش کر لیا ہے، صہیونی فورسز نے ہیلی کاپٹر اور ٹینک سے بم باری بھی کی۔

فلسطینی وزارتِ صحت کا کہنا ہے کہ اسرائیلی فوج کا دعویٰ ہے کہ ان پر مسلح افراد کی جانب سے تین راکٹ فائر کیے گئے تھے۔

صیہونی فوج کے ہاتھوں شہید ہونے والے فلسطینیوں کی عمریں چوبیس سے تیس سال کے درمیان تھیں۔

ادھر میڈیا رپورٹس کے مطابق فلسطین کے علاقے غزہ کی پٹی کے شمال میں بیت لاھیا کے شمال مغربی مقامات پر اسرائیلی جنگی ہیلی کاپٹروں نے متعدد اہداف پر بمباری کی ہے۔

اسرائیلی فوج کا دعویٰ تھا کہ غزہ سے داغے گئے تین میزائلوں میں سے دو کو دفاعی نظام کے ذریعے ہدف تک پہنچنے سے قبل ہی فضا میں تباہ کر دیا گیا تھا۔

اسرائیلی فوج کی جانب سے ایک ویڈیو جاری کی گئی ہے جس میں دکھایا گیا ہے کہ فلسطینیوں کا ایک گروپ شمالی غزہ کی سرحد سے دراندازی کی کوشش کر رہا ہے۔

واضح رہے کہ صہیونی فوج نے 10 اگست کو بھی چار فلسطینیوں کو شہید کر دیا تھا، جن کے بارے میں ان کا دعویٰ تھا کہ وہ سرحد عبور کر رہے تھے۔

گزشتہ روز فلسطین میں غزہ پٹی میں ہفتہ وار احتجاج کے دوران اسرائیلی فوج سے تصادم کے دوران ایک فلسطینی شہید جب کہ 30 سے زائد افراد زخمی ہو گئے تھے۔

معروف آسٹریلین کالم نویس کے کشمیر میں بھارتی جارحیت سے متعلق ہوش رُبا اعداد و شمار