بھارتی نژاد نکی ہیلے اقوام متحدہ میں امریکا کی سفیر نامزد

امریکی میڈیا کے مطابق نو منتخب امریکی صدر ٹرمپ نے ریاست جنوبی کیرولینا کی بھارتی نژاد گورنر نکی ہیلے کو اقوام متحدہ میں امریکا کی سفیر بننے کی پیش کش کی تھی، جسے نکی ہیلے نے قبول کرلیا ہے۔

چوالیس سالہ نکی ہیلے انتخابی مہم کے دوران ٹرمپ کی سخت ناقد رہی ہیں، انہوں نے ٹرمپ کو مہاجرین اورنسل پرستی سے متعلق بیانات پرسخت تنقید کا نشانہ بنایا تھا۔

نکی ہیلی کا اصلی نام نمرتا رندھاوا ہے، وہ ایک بھارتی نژاد امریکی خاتون ہیں، جن کے آباؤ اجداد کا تعلق بھارتی پنجاب کے ضلع امرتسر سے ہے جب کہ ان کے خاندان کا تعلق سکھ برادری سے ہے اور انہیں کم عمر گورنر ہونے کا بھی اعزاز حاصل ہے۔

ہیلی نے جنوب کرولینا کی پہلی خاتون گورنر بن کر ایک تاریخ رقم کی تھی، اس سے قبل 2007ءمیں بھارتی نژاد امریکی لولی جندل لوزیانہ کے گورنر بنے تھے۔