سرکس سے بھاگنے والے دو قاتل ٹائیگر موت کی علامت بن گئے
شنگھائی : چین میں سرکس سے بھاگنے والے دو قاتل ٹائیگر موت کی علامت بن گئے، پکڑنے کی تمام تر کوششوں میں ناکامی کے بعد آج وہ اپنے انجام کو پہنچ گئے۔
تفصیلات کے مطابق چین میں سرکس کے دو ٹائیگرز کو گولی مار کر ہلاک کردیا گیا ہے، جو ایک خاتون ورکر کو زخمی کرنے کے بعد بھاگ نکلے تھے جو بعد ازاں دوران علاج دم توڑ گئی۔
مذکورہ ٹائیگرز نے سرکس کی خاتون ملازمہ پر اس وقت حملہ کیا جب وہ انہیں گوشت ڈال رہی تھی۔ ٹائیگرز کے حملے میں خاتون شدید زخمی ہوئی جس کو اسپتال منتقل کیا گیا لیکن وہ جانبر نہ ہوسکی۔
چین کے سرکاری ٹی وی کے مطابق علاقے کو مکینوں سے خالی کرا لیا گیا اور مرغی کے گوشت کو بے ہوشی کی دوا لگا کر مختلف مقامات پر رکھا گیا تھا۔
تمام تر اقدامات کے باجود حکام ٹائیگرز کو پکڑنے میں ناکام رہے، بالآخر گزشتہ روز دونوں قاتل ٹائیگرز کو گولی مار دی گئی ہے۔ چین میں ایسے واقعات مسلسل رپورٹ ہو رہے ہیں، جن میں خطرناک جانوروں کا قید سے بھاگنا اور لوگوں کو مارنا یا زخمی کرنا شامل ہیں۔
گزشتہ ہفتے چڑیا گھر کے ایک ٹائیگر نے بھی ملازم کو حملہ کر کے ہلاک کردیا تھا۔ ملازم ٹائیگر کا پنجرا صاف کرنے کی غرض سے اندر داخل ہوا تھا۔
اس سے قبل چین میں ایک سفاری پارک سے تین تیندوے فرار ہوگئے تھے۔ سفاری پارک کی انتظامیہ نے یہ خبر چھپادی تاکہ لوگوں میں انتشار نہ ہو۔ دو تیندووں کو پکڑ لیا گیا ہے لیکن ایک تاحال باقی ہے۔
